被指有「強逼症」　黎明自認完美主義者

天王黎明（Leon）除咗唱歌演戲出色外，原來做導演都一樣咁叻，皆因佢首次執導新電影《搶紅》，不論工作能力同態度都備受讚賞。呢日網上就有段關於Leon套電影嘅宣傳花絮特輯片段，嘩！有得睇Leon執導嘅花絮喎，當然就引起網友嘅關注啦！片中就見到Leon親身上陣擔任唔同嘅崗位，如道具、攝影、燈光、演員等，真係超級厲害，而且佢喺每一個位置都非常認真同落力，難怪監製黃建生對Leon嘅表現都非常欣賞，大讚佢十分用心同投入，絕對係一位出色嘅導演。

另外，劇中嘅演員王耀慶、南伏龍等就搞笑指Leon有「強逼症」，因為佢事事都追求完美如道具嘅擺位同戲中嘅節奏快慢，Leon都有自己嘅一套想法，絕對係一位完美主義者呀!