離婚後多咗時間　陳逸璇唔急搵伴

藝人陳逸璇（Jolie）出席慈善宴會，為基督教團體獻唱歌曲表示非常有意義，她說：「今晚我會唱《Greatest love of all》，係一首我覺得非常有意思嘅歌嚟，而我已經第四年幫呢個Charity唱歌，自己都有信主，係同一個信仰。但其實我之前係同我媽咪一樣信天主教，不過近年轉咗去基督教。」她稱自己有參與其他公益慈善活動：「我有試過幫佢哋賣旗同派飯。（會採訪？）會呀，其實香港人好幸福，但同時好多人發生好少事就會轉牛角尖，所以我想幫多啲人。」問到是否離婚後多咗時間？她說：「時間多咗可以做自己鍾意嘅嘢。（多追求者？）呢樣慢慢喇，要認識深啲，始終有過不幸經歷，要小心啲。」

出歌遇阻滯

至於音樂事業方面，原本她打算出歌派台但遇到阻滯：「本身會派，但我哋隊Band冇咗個鼓手，其實佢都有幫緊另一隊Band玩，依家佢經理人就唔再批一齊玩音樂。不過唔急，但可能要轉類型。（但之前話出碟，幾時？）我哋本來有4首歌，其中一首係英文，但都因為同樣原因未出得住。（今年一定要出新歌？）一定要，不過人生係咁，以為可以跟原定計劃，點知會有阻滯，所以有信仰好重要，有啲可能唔係咁啱我，最後可能可以更好，要Stay Positive。」