《學是學非》絕密NG 森美被寸爆勁搞笑

20170527
東網電視
更多新聞短片
《學是學非》絕密NG有得睇!
無綫節目《學是學非》四輯以嚟都非常受歡迎,皆因除咗有森美、梁嘉琪、麥美恩呢啲搞笑主持坐陣外,之前仲要有女神級嘅「是非精」如李佳芯、湯洛雯(阿湯)、黃心穎等,嘩!個個都係宅男女神,所以點會唔引起網友嘅關注。雖然新一輯就有啲調動,加入咗啲新嘅「是非精」就係港姐馮盈盈、劉穎鏇(Tiffany)、張寶兒,不過網友都話會擔定櫈仔支持,話新人加舊人一定好有火花。
分三方面再訓練
無綫「my TV Super」Facebook專頁就上載咗一條佢哋嘅絕密NG片段,當中就有唔少蝦碌場面,分咗三方面要佢哋再次訓練吓,相當搞笑。第一種係攝影機位置訓練,片中就見到一Roll機,嘉琪、美恩、阿湯同森美都各有各望,而美恩嘅表情亦非常誇張,投入感爆燈,令人笑爆嘴,不過導演就Cut機話希望佢哋視線可以一致,到另一Take,佢哋要做佢哋嘅招牌動作「學是學非,明辨是非」嘅時候,佢哋又再次各有各望,森美呢次仲亂咁嚟,完全唔識做佢哋嘅招牌動作,嘉琪都忍唔住寸佢呀,話佢已經拍第五輯都未識做,網友話森美平時同小儀拍檔,就寸得人多,依家畀人寸番,不知睇得幾過癮,認真搞笑。
寶兒要繼續努力
第二種係對白訓練,好似寶兒太心急喇,嘉琪都未講完就衝咗出嚟,之後到博士同樣都未解釋完理論,寶兒亦都太過緊張好快咁講咗佢嘅對白,不過對新人嚟講係需要時間掌握個節奏,網友都留言叫佢唔好緊張,繼續努力,寶兒聽唔聽到呀?
鏡頭前後都係咁癲
第三種係演技訓練,嘉琪、美恩、阿湯簡直係完美示範咩叫做演技,網友都讚冇得頂,片中就見到一Roll機坐喺後排嘅嘉琪、美恩、阿湯非常入戲,表情古靈精怪,美恩要做得勁搞笑,三位都非常有演技,不過盈盈、Tiffany同寶兒始終經驗尚淺,唔夠放,所以導演都Cut機叫佢哋再放啲,再嚟一Take就有進步喇!最尾仲要加送佢哋未Roll機嘅時候,玩得好癲嘅場面,網友都話鏡頭前後嘅佢哋都非常癲,話咁樣先夠晒貼地,總之一句正呀,Like爆佢哋咁話!
網民有話兒:
KXCXXRXX TXX :一定擔定櫈仔支持,新人加舊人一定好有火花!
HXXYXX LXX :咁多女神,真係集集追呀!
JXXNXX CHXX:見到森美畀人串(寸)番,好搞笑。
NXXX IKXX:寶兒唔好緊張,繼續努力。
TXCXX MHXX :佢哋夠晒貼地,like爆呀!