李拾壹唔敢市場擺攤　自嘲蝕硬

歌手李拾壹、王禮宗到市集表演，兩人均指是為了幫朋友而來，他們本身亦喜歡在市場唱歌。問到可會有意自己擺設攤檔？李拾壹自認沒有這方面的材能：「我會鍾意行同睇多啲，同埋可以發掘多啲新聲音，依家好多獨立音樂人，甚至主流歌手都會嘅，所以我除咗去尋寶之外，就係聽吓啲新聲音！」他又坦言不會搞生意，因一定會蝕錢：「我係唔得嘅，一係賺晒一係蝕晒，我應該係蝕硬嘅，我連打機入嗰啲遊戲都唔得，所以真嗰啲更加唔好喇，死硬！（冇人搵你？）又真係冇，我身邊啲人都好清楚我係點嘅人，佢哋都唔想我死㗎，叫我都係做番音樂啦，個天係公平嘅，我除咗音樂以外嘅所有嘢，都可以用智障嚟形容，好似煮嘢食、畫畫、做生意咁！」<br/><br/>而王禮宗則表示有意開檔，賣一些細細粒、無厘頭擺設：「好多嘢，例如好似啲陶瓷公仔，但係唔係正常一般咁嘅，可能係騎騎呢呢、好唔等使嘅嘢，我本身係好鍾意呢啲趣怪嘢嘅，望住佢又唔知做乜咁，屋企都收藏咗好多，所以一過年就會畀阿媽掉走一大批！」不過他坦言開檔一事通常只是空想，未有實行。