估佢似幾多人！樂壇新人林羨淇係萬能Key

有人話香港樂壇係一潭死水，就算歌手有把天籟靚聲，甚至有埋靚樣都好，但未得到大眾關注，點都捧唔起。不過，香港樂壇最近終於有啲「起色」，有個女新人出道只有短短兩個月，但憑獨特嘅歌聲，加上混合林夏薇X王祖藍嘅樣貌，因而紅爆網絡，佢就係林羨淇（Suga）！Suga仲食住個勢，尋日再推出新歌《觀音兵》，迅速成為全城熱話，短短12個鐘已經有近6萬嘅網上瀏覽次數，認真巴閉！

Suga早前喺新歌《男神為我唱首歌》玩神秘路線，學黎明旗下新人JC咁出聲唔出樣，mv入面唔係戴帽，就係戴墨鏡遮樣，個人社交網站亦甚少上載自拍照，搞到網友都好好奇，今次佢終於公開正面樣！知道大家等咗好耐，所以新歌mv一開頭已經見到Suga嘅側面，之後仲嚟個close up影大頭，網友都話Suga同林夏薇「撞樣」，但個厚唇好似王祖藍，某啲角度又似徐子珊，咁咪同蔡思貝一樣，世界各地都有失散兄弟姊妹喎！

重頭戲當然係佢嘅歌聲，頭先話佢「先聲奪人」，皆因佢唱功唔算標青，仲被嘲成首歌tune過，但每隻字都唱到走音，要搵唔走音嘅part真係難過登天喎！但公平啲講，上次Suga唱國語歌，普通話水平一般嘅佢咬字麻麻，自然影響唱功啦（好似係），今次新歌係廣東話歌，用母語唱歌應該有唔同嘅！

網友又點睇先？佢哋紛紛大讚新歌依然一聽「難忘」，mv亦「好難忘」，皆因mv布景分別係黑白同鮮紅色調，即刻令人聯想鬼節，有網友提議喺農曆七月十四先推出更有效果，仲有人留言「不能只有我聽到」，擺明係有「好嘢」要開心share！但唔少人都認同Suga嘅唱功始終如一，咬字同發音依然麻麻，成首歌都keep住走音狀態，進步嘅空間相當大，有網友仲建議Suga轉唱粵曲，行新路線話唔定殺出一條血路！加油呀！

網民有話兒：

TiffXXXLi：不能只有我聽到。

XXeungChXX：你條路唔易行，尤其香港呢個文化沙漠，唔好灰心唔好氣餒，你總有一日成功o架，粵曲界靠你啦！

XXXusLi：唔好再浪費電去創作垃圾好冇？

SueTsXXX：MV拍到好似鬼片咁，配合農曆七月十四打歌一定大紅。

MiXXXear：原來就咁高音啲去讀歌詞再配埋音樂就叫唱歌。