入行廿七年！唐寧8歲開始做童星

藝人唐寧主演嘅無綫劇集《蘭花刼》雖然係十年前拍落嘅劇集，但睇落當年25歲嘅佢，同而家35歲嘅佢好似食咗防腐劑咁個樣冇乜點變！查實原名為江麗娜嘅唐寧入行廿七年，首部作品係八歲時參演由周潤發、鍾楚紅同張國榮合演嘅《縱橫四海》，當時唐寧撞正《縱》喺正佢屋企樓下拍，咁啱經過就被睇中，仲飾演鍾楚紅嘅童年，自此開始佢嘅演藝之路，仲同唔少當紅偶像、甚至天王巨星合作，包括樂隊Beyond主演嘅《Beyond日記之莫欺少年窮》、張國榮同林青霞嘅《白髮魔女傳》、周星馳嘅《算死草》等等！講最經典，當然係唐寧十五歲時拍嘅《四個32A和一個香蕉少年》！

除咗拍戲，同時唐寧都有入屋分別喺無綫同亞視拍多部電視劇，包括金牌編劇韋家輝兩部神劇《大時代》同《馬場大亨》。直至19歲，大個女嘅唐寧正式加入無綫拍劇，參演《烈火雄心2》、《談判專家》、《戇夫成龍》、《阿旺新傳》等，在無綫八年來拍了超過廿部劇集，並曾多次入圍《萬千星輝賀台慶》的「飛躍進步女藝員」但最後無緣問鼎！在2008年離開無綫的唐寧，其實在前一年即2007年已開始轉戰舞台劇界，首部處女作為《爆谷殺人狂》，同時也促成和鄧偉傑結緣。