停工照顧病母　王若琪自責冇錢救亡父

歌手王若琪（Takki）推出新歌《世人笑我太瘋癲》，事隔兩年才出歌的她透露去年經歷了很多不開心的事：「媽咪感冒導致肺炎，冇諗過咁大件事，跟住入咗ICU個幾月，直頭昏迷咗，醒番又發現左腦中咗風，依家半邊身唔係太郁到，講嘢都唔係好表達到。」她惟有停工待在醫院，照顧生命危在旦夕的媽媽：「佢插咗喉好辛苦，用胃喉餵食，要綁住佢隻手，我驚佢有咩事冇人知。」直至聘請了專業人士幫手，Takki才可以繼續音樂事業。說到花了自己和媽媽不少積蓄，她慶幸除了唱歌，尚有教學工作：「一嚟幫年青朋友搵夢想，二嚟香港歌手淨係做音樂比較難生存。乜嘢都做吓，亦都係自己喜歡嘅工作，仲撐得住。」她知道媽媽躺在病床的日子很難過，所以無論多繁忙，都堅持一星期放假一天陪伴對方。

為爸爸嘅死自責

數年前經歷喪父之痛的Takki曾經非常迷失和自責，認定假若能夠賺多點錢，或有機會救回患上肺癌的爸爸。事後她以不太適合自己的女性形象接拍廣告，目的就是賺錢：「當時覺得對爹哋唔住，到媽咪有事，原來一個感冒可以變成咁嚴重，點解我唔去做自己喜歡嘅事？條路始終係我嘅，開心最緊要。」媽媽發病至今近一年，依然食得瞓得，亦會笑和發脾氣，總算慢慢有進步，Takki謂：「好多醫生或者物理治療師話佢成世都要坐輪椅，但我唔信邪，同細佬不斷搵治療，一個星期做3次針灸，希望佢有番活動能力。」即使醫生說媽媽有機會離世，Takki則認為與其日哭夜哭，倒不如多做復康：「有樣嘢幾得意，媽咪多咗好多面部表情同表達方式，會成日扁嘴，朋友畀500蚊利是就好開心，畀100蚊就OK啦。」Takki早年搬出去住，媽媽的病成為了兩姊弟加深溝通的橋樑：「我哋嘅相處方式就係鍾意嬉笑怒罵，唔想大家太傷心。我有時服侍媽咪，細佬會話『勁喎，第時冇嘢撈就去老人院做啦』。我同細佬多咗好多互動同商量，都多謝佢分擔咗好多嘢，好乖仔。」

感覺人間有愛

想到年老時可能遇上與媽媽相似的情況，Takki曾懷疑能否像對方一樣堅強，後來則學懂以平常心面對一切：「仲有得出騷、出碟、做訪問，我已經非常之開心。」現在她親自負責歌曲、形象與聯絡等工作，避免出現像衣不稱身的情況：「以前有啲嘢唔係自己嘅，做訪問我會諗，死啦，講咩呢？爸爸走嗰時我都寫咗首歌，但係我好怕講，驚人哋覺得我藉呢件事做宣傳、做新聞。依家諗通咗，我好想同大家分享，屋企人有病係成家嘅事，每一個人都要面對。」早前她在社交平台寫了一篇長文抒發心情，沒想到很多人因此介紹醫生給她：「老土啲講真係人間有愛，希望大家面對呢件事嘅時候，都有我同你哋分享，你哋唔係孤單。」

化妝：Melody Chiu

造型：Fame Glory

服裝：Agnes' B

鞋：Giuseppe Zanotti