可悲共通點！組合叫「未能接通」有段古！

由主音劉卓軒（Hinry）、鼓手Fing、結他手KK及bass手Rocky所組成的90後本地樂隊，以「未能接通」作為樂隊名稱，原來是因為四位隊員的一個共通點，他們笑說：「因為我哋幾個個電話都成日打唔通，搵唔到我哋，WhatsApp又少應機，呢個就係我哋好可悲嘅共通點，所以就攞嚟做band名！」

成立兩年半的「未能接通」將於7月15日推出首張EP及舉行音樂會，沒有唱片公司的經濟支持，4位成員要分擔錄音、印碟等將近6位數的費用：「我哋想出隻出到街嘅碟，所以搵咗專業做錄音嘅監製去做，錄音方面花費咗好多錢，到印碟又要印到相當數量先回到本，仲有出紀念品，好似Tee、貼紙、布袋等，幫我哋做設計嘅朋友，場地錢等，對於我哋幾個嚟講好吃力。」雖然金錢的付出與回報未必能成正比，但四人依然堅持出實體碟：「Touch wood就算出完第一隻碟就散band或者市場上冇人認同，但我哋都有隻實體碟去講畀將來啲仔女聽，我哋都做過啲好熱血嘅事，呢隻實體碟就係我哋呢幾年嘅時光嘅一個證明，提醒自己勿忘初衷。」

碟中收錄5首他們親自創作的作品，有勸戒大家不要再遲到的《暫時未能接通》、給追夢者的《找藉口是失敗者的習慣》，亦有講述學童自殺問題的《明鏡》，主音Hinry說：「呢首歌比較沉重少少，寫呢首歌係初期好多學童自殺嘅時候，最心痛係由錄歌、出歌呢一年之後，個情況仍然冇改善到，首歌係想寫畀有壓力嘅人聽，或者活喺呢個社會覺得好沮喪嘅人聽，有人好支持佢哋嘅，我哋亦都第一次嘗試將儒家同道家思想擺入去歌詞到。」