秘撈做保安　何俊軒撞見樂易玲要即閃人

藝人何俊軒接受電台訪問，透露入行前曾於廚房工作，因為喜歡吃：「我16、7歲就輟學，當時幫大廚還雜誌去報紙檔，報紙檔太子話介紹我去做電影特約演員。做咗兩、三年就幫屋企賣生果，之後有星探搵我拍廣告，人工高啲。」但兩、三年後沒工開，家姐叫他報藝員訓練班，但剛巧截止報名，等待期間他舉啞鈴做準備，終於在半年後考入。提到曾與偶像梅艷芳合作，他自爆不敢合照：「開工成日見到佢，佢成日探班，好似女神一樣，只可遠觀。（有冇傾過偈？）有，問佢身體點，好似小fans咁關心佢。」

4日3夜冇返過屋企

至於如何形容無綫的生活？他認為是忙碌和冇得瞓：「訓練班出嚟好多工作，乜都搵你，因為冇錢收，不過攞經驗。我喺清水灣年代，試過4日3夜冇返過屋企，但愈忙愈開心。」拍《飛虎2》時，他的通告與主角馬德鐘一樣多：「一齊冇得瞓，但成班好開心。（你操到好弗？）藉呢個機會多謝一班兄弟，我操到咁弗，但係冇機會喺鏡頭前畀大家睇，佢哋就話更衣室場戲，佢哋個個着衫，得我一個唔着。佢哋話我操得咁辛苦，呢場畀我啦，我好感動。」何俊軒又透露任職無綫時曾有不少秘撈，包括大型活動的保安，笑言一見到樂易玲和曾勵珍就要找人頂替。

「落樓梯、落斜路好痛苦」

提到拍《飛虎》時曾經出意外，他說：「拍動作戲，我要喺後面箍住一個演員，佢批踭，我就走開落地，但結果打中咗，我要入醫院。」而早前拍《踩過界》時亦有意外發生：「地下好多花，好跣，我向後跌，蔡思貝責住我，頂住我隻腳，但我上身扭緊，結果扭斷咗十字韌帶，人生第一次痛到叫人唔好掂我！」說到即將離開無綫，他坦言因為很多工作都做不到，搬重物及走快點都不行：「落樓梯、落斜路好痛苦，大腿肌肉萎縮得太犀利。」