BabyJohn少壯不努力　老竇秦煌徒傷悲

無綫新劇《老表，畢業喇！》最近開始播出，今集參演「老表」嘅藝人比過往兩輯多好多，就連喺港劇久未露面嘅蔡少芬都「重出江湖」，陣容非常鼎盛！當中首次出現無綫螢幕前嘅蔡瀚億（BabyJohn），今次喺劇中飾演外國回流返港嘅富二代兼太子爺「史德華」，佢嘅角色同王祖藍飾演嘅「蔡芯」好相似，又係講廣東話唔正，不過分別在於BabyJohn喺外國讀書長大。

雖然BabyJohn係「ABC」，但係英文水平「高」於常人，有幕講佢喺社交網post咗一段「Daddy, R.I.P.」嘅帖文而引起一場誤會，咁啱當時飾演BabyJohn爸爸「史博文」嘅秦煌正由英國飛去法國，而英國機場亦發生恐怖襲擊，就連國際新聞都有秦煌逝世嘅報道，搞到所有人都以為秦煌真係死咗！

不過最搞笑係出post嘅BabyJohn，竟然反問蔡少芬點解爹哋會死，原來佢只係太掛住爹哋而出呢個post，「R.I.P.」係代表「Rich Is Poor」嘅意思，因為佢知道山區兒童冇爸爸係幾咁慘，就算幾富裕，冇咗爸爸嘅愛，內心都係好窮，真係聽到蔡少芬滴晒汗，認真大整蠱！之後嬲爆嘅秦煌問不學無術嘅BabyJohn R.I.P.究竟咩意思嘅時候，BabyJohn竟然答Rich Is Power，Rich Is Pure呢啲令人好嬲又好笑嘅答案，真係創意無限呀！呢場誤會不但令集團股價急跌之餘，仲擺烏龍出咗訃聞，搞到飾演公關部高層「Mon姐」嘅蔡少芬不幸被炒魷魚，認真陰功豬！

劇集播出已經反應熱烈，唔少網民話一輯比一輯有驚喜仲大讚BabyJohn演技幽默，連影帝周潤發都曾經讚過佢好有喜劇感，繼續努力！

網民有話兒

Rxxxxg xxe：估唔到babyjohn（BabyJohn）做得幾好！

Txxa Bxxn：好掛住Ada做戲～～～支持妳

金XX：Rich is poor, Rich is power!!!!hahahahaha

Alxxx Txxx：驟眼睇我以為BabyJohn係陸永.....