媽咪好友捧場　Jackson單拖襲港狂攬粉絲

韓國人氣男團GOT7的香港成員Jackson傍晚在觀塘apm舉行粉絲見面會，是他首次單拖在香港會粉絲，吸引近400粉絲圍觀，逼爆商場各層，而Jackson的媽咪及好友亦有來棒場。

身穿豹紋裇衫的Jackson於傍晚6點05分登場，現場立即傳出震耳欲聾的尖叫聲，Jackson亦立即興奮大叫，並向大家打招呼：「Hi apm！我係Jackson王嘉爾！」他見到主持林柏希時便說：「我哋上次已經見過。」講到有不少粉絲早於今早9點便到場霸位，粉絲為換拍手證亦要通宵排隊，Jackson便立即多謝粉絲，又搞笑地問候粉絲：「你哋排隊時係咪坐地下，有冇墊住嚟坐？小心屁股怕凍！」聖誕節將至，問他有甚麼聖誕難忘回憶，他便笑指是陪住媽咪去Shopping，因為聖誕有大減價，談到2018年的工作大計，他便指因為近來做了不少綜藝節目，好像令人誤會他只會搞笑，希望新一年專注音樂活動，他又笑言在香港行街好方便，因為沒人認識他，所以希望明年能多回香港活動。其後Jackson向上層的粉絲打招呼，更問主持可否上樓上見粉絲，期間有粉絲將Jackson母校的T-shirt拋下台，Jackson亦興奮地接下，並拿着衣服影相。

Jackson之後與粉絲大玩遊戲，先與兩位女粉絲玩「可愛的你」的遊戲，由他選出哪個粉絲的表情更可愛，他賣口乖讚兩個粉絲一個可愛、一個性感，之後他又識做地逐一同粉絲抱抱，其後又有粉絲上台畫聖誕卡及與Jackson做出指定動作，Jackson先後與3名粉絲做出心形甫士，令台下粉絲妒忌尖叫，而他之後更與林柏希上演從後抱做心心的甫士，十分爆笑！而期間Jackson與台下粉絲互動：「食咗飯未？今日唔係返學咩？記住睇完騷之後要做功課，如果唔係畀阿爸阿媽鬧。」

其後Jackson換上另一套衫演唱Solo歌曲《Papillon》，期間不時跳下台同粉絲互動，又唱到站上聖誕裝置上，非常跳跳紮，令粉絲聽到勁High，其後更Encore再唱多一小段，演出結束後，他熱爆除下外套，只着背心晒肌。

望與Twins拍戲

他之後接受傳媒訪問，問他在活動上狂攬粉絲，會否驚媽咪嬲？他便笑指：「愛我嘅人，應該要愛番佢，阿媽唔會嬲啦，佢都冇催我，阿哥都結咗婚啦，（咁唔係更加會催你咩？）依家連女朋友都冇，連瞓覺時間都冇，等我工作搞得掂，自己照顧到先至諗啦，（怕唔怕到時年紀好大呀？）咁又唔會等到80歲嘅。」

問會否想回港拍戲，他就表示有機會當然想拍，他笑指：「好多人都會搵我怕偶像劇、三角戀嗰啲，但我比起呢啲，更想拍武打片、動作片同警察片。」而他表示從小便喜歡鄧麗欣、鍾嘉欣和Twins，但謙虛地指自己還是新人，對方未必會想與他合作。

----------------------------

東網巨星開咗ig喇，大家快啲follow啦！