賀「20歲大壽」鄧月平發現有人追

藝人鄧月平（Larine）到電台宣傳歌曲《女神經》，身穿厚褸現身的她笑言可能日前20歲生日時穿太少衣服，所以現在發燒，而閨密為她準備了很多活動：「之前佢去酒窖布置，成班朋友同我慶祝，然後去沙灘砌咗個心畀我。到正日4號佢話6點接我，叫我唔好問去邊，我哋去咗塘福（大嶼山）BBQ，燒到半夜3點，食咗好多個蛋糕，跟住就病咗。第朝7點就起身，拍邵音音個節目。」笑言如果生日沒這麼多慶祝就可以休息一下，但亦感激朋友的心意：「由頭到尾我都唔知個行程，去到每個地方都有驚喜，但都好凍。」

聖誕節多約會

Larine大讚朋友有心思，但她本來只想食餐飯慶祝：「佢話唔得，20歲係大壽，踏入另一個字頭一定要慶祝。佢哋一早鋪排咗，但嚇親我，話帶我去探靈同瞓街。但原來安排得好好，啲汽球又吹好晒，仲有我個名，蛋糕都係親手整。」

談及20歲的目標，她表示會做義工，訂了手襪派給公公婆婆，認為幫人的感覺很放鬆。而聖誕就會在工作中度過，亦有約朋友吃飯：「23號喺我屋企搞Party，我會整中菜，25、26號就去我閨密屋企，佢買咗聖誕樹。」

問可有拍拖？她強調沒有，但有追求者：「觀察中。（幾多個？）1,000個！講笑啫，一、兩個啦！原本我唔覺佢哋追求我，過咗生日就特別顯眼。個男仔對我特別殷勤，我就直接問佢係咪想追我，佢哋話係喎。」她自言不急於拍拖，下年打算出3首歌，還要拍電影，未來的男朋友需要諒解她工作繁忙。

----------------------------

東網巨星開咗ig喇，大家快啲follow啦！