見過三次工　吳雨自爆未獲亞視聘用

「亞洲電視數碼媒體有限公司」今日舉行成立典禮，現場由「亞洲電視行政總裁」吳雨、「營運總裁」區偉林舉行了「ATV亞洲電視APP」啟動儀式。吳雨表示與亞視很有淵源，原來他在幾十年前去過亞視見過三次工，但三次都未有獲聘用：「頭兩次見PA（助理編導），第三次見場務，但都唔請。唔知係咪自己樣衰，依家終於明白，係個天要我等幾十年，考驗我嘅內心、信心同忠誠。今日終於加入亞視做到呢份工，呢份工好重要，可以見證亞視踏入新里程。上周二法院批准亞視重組，令亞視呢個有六十年嘅品牌屹立不倒，繼續為觀眾服務。1月29日便會正式啟動。」

拍《英雄本色》電視劇版

談及亞視復活後的向，吳雨表示2018年有兩套自家製劇集推出，《我和殭屍有個約會》和《英雄本色》電視劇版。劇集將於明年開拍。曾華倩即問會否請周潤發演出？朱慧珊搶答：「有可能㗎！」曾華倩則表示：「咁又係，大把錢。」

吳雨則表示大家都好關心邊個做Mark哥，請大家拭目以待：「會同內地合作，因為《英雄本色》係買電視版權，都唔平，係一個咁大嘅品牌。（億計？）唔止，唔緊要，內地市場好大，亦會用內地演員、亞視藝人。（會唔會簽一啲長約亞視藝人？）遲啲會有亞視藝人選舉，搵一啲新人簽長約，當然唔可以喺其他台亮相，屬亞視藝員。」

月費38蚊機頂盒68蚊

問今次「亞視重生」投資額？他謂：「我哋用廿億買晒王征51％股份，最尾折扣23％，大概用咗五、六億左右。（夠唔夠現金營運？）冇問題，依家都要添置器材，廠房亦要修葺一吓，好多錢要用！（大概營運資金？）唔計收購，每年要用四億！（幾時回本？）呢啲唔計，OTT係大勢所趨，唔係靠廣告、觀眾用戶，係一個開放平台，收入來源好多，好難估計。亞洲電視個App，月費38蚊，機頂盒68蚊月費。（同myTV SUPER競爭？）呢個係大勢所趨，睇好嘢要付費畀錢，我哋唔係同任何人競爭，自己做自己嘢，依家確有啲模式相似（意指同myTV SUPER競爭）。」

首要做得到係出糧準時

吳雨還透露亞視的新台徽似鑽石：「代表永恒、金光閃閃、䇄立不倒，幾有氣勢！（係咪之前嗰個唔吉利？）唔係，之前嘅投資者都好努力，唔好抹殺佢哋功勞！（有冇諗過做埋免費電視？）免費電視好難做，大家都轉緊去做OTT！（嚟緊出糧會準時嗎？）我接受任命嘅時候，首要做得到嘅就係出糧準時，唔擔心呢個問題，老闆有咁多間大型上市公司，佢哋想做起亞視，呢個係香港人之福。」

送價值百萬元馬國住宅

另外，亞視還會舉辦不少活動送獎品送錢，先有一個《亞視巨獎「樓」俾你》大抽獎，由即時起至2018年3月31日，下載亞視App並成為會員，就有機會贏得價值一百萬元的馬來西亞住宅單位一個，而每日亦會抽出十份五百蚊現金禮券獎幸運會員觀眾。

----------------------------

東網巨星開咗ig喇，大家快啲follow啦！