合力搞35周年展 家強陳健添反目24年終破冰

20180502
東網電視
更多新聞短片
反目24年終於破冰合作搞35周年紀念展覽。
今年是樂壇班霸Beyond成立35周年,曾跟成員黃家強為合約反目24年,搞到對薄公堂及展開罵戰的前經理人陳健添(Leslie),由5月1日至月尾為止,為Beyond舉行最後一次展覽活動「Beyond傳奇35周年展覽」。難得今次展覽得黃家強破冰支持,罕有地令Beyond「四位一體」齊集展覽館,重現Beyond的光輝歲月。
第一時間通知家強
身在澳洲的Leslie接受東網訪問時表示:「我今年年初定咗落實咗舉行呢個展覽會,我係第一時間email通知家強呢件事,好詳細講畀佢聽,我哋同時又搞版權問題,去借啲更珍貴嘅嘢出嚟,今次家強好正面地精神上支持我呢個展覽。」問到跟家強的關係可有改善?他說:「始終未有機會見到面,我唔敢講話有咩突破,但起碼有一樣嘢,就係大家用一個理性嘅角色去睇呢件事,根本上係關係冇惡化啦。」
將拍賣大部分展品
Leslie又談及展覽中,家強在Beyond年代早期用過的低音結他,他說:「呢支Bass我係通過朋友嘅朋友,比較間接嘅借番嚟,我都有通知家強,講佢知佢用過一支Bass,我哋都會擺出嚟展覽,我哋都有徵詢過佢意見,根本上佢係冇反對。」他又說家駒用過支結他,就是家駒在1991年,舉行完「91生命接觸演唱會」後送了給樂隊LMF成員老占(Jimmy),而1993年,家駒在日本意外身亡,老占一直將家駒支結他放在通利琴行,多得老占幫忙借出。至於展覽收入問題,可擔心又令家強誤會「斂財」?他說:「我都通知咗家強,喺展覽每個入場人頭,有3蚊收入歸我,但我已經將啲錢捐畀幫助老人家嘅慈善基金。」而完成展覽後,他決定將大部分展覽中的展品給歌迷及收藏家以拍賣方式賣出去,而拍賣所得收入全數捐給澳洲悉尼一佛堂,故他辦的Beyond展覽將會是最後一次。
至於Beyond三子可會現身展覽會?Leslie表示:「我都個別邀請咗佢哋可以隨時嚟,係清咗場冇騷擾嘅情況下,等佢哋慢慢欣賞今次嘅展覽,佢哋會唔會嚟就會睇番佢哋嘅時間,暫時未同我確實邊日會嚟。」
----------------------------
東網巨星開咗ig喇,大家快啲follow啦!