童星出身習慣咗！黃美棋玩遊戲都畀人綁架

藝人黃美棋近月加入無綫，更有份參與遊戲節目《大玩特玩》，每星期與一眾藝人玩遊戲放笑彈，集集笑料不絕，她直言參加這類節目絕對是夢寐以求，她說：「每個遊戲都係幕後人員精心安排，我哋都玩得超開心！因為拍呢個節目Bob（林盛斌）仲幫我改咗個名做『美棋之星』，事源上集最後一個接力Game，我哋嗰隊落後緊，最後嗰棒係我，對方係身材高大嘅Shiga（連詩雅），個個以為我哋輸梗，點知最後畀我追番！」<br/><br/>最新一集其中一個遊戲是玩入籃，不過就別出心裁，畫面一樣笑爆嘴，美棋說：「每隊派一個隊員做籃球架，大家覺得由我呢個隊長做會最合適，因為我比較細粒，佢哋入籃都易啲！點知玩玩吓，我畀人連人帶架一齊『綁架』咗，抱住我跑咗成個圈，場面好搞笑！連我自己都笑到收唔到聲！」期間中一眾隊員向住美棋大叫「畀番個女我」，畫面更跟最近重播的《刑事偵緝檔案》情節非常相似，當年是童星的她亦一樣畀人綁架抱住跑足成條街，相當巧合！美棋說：「節目出街之後，啲人都同我講話個節目好好笑，又讚我你好勁！網上又睇到大家留言話睇得好開心，嗰刻滿足感好大，覺得呢個節目好好，可以帶歡樂畀大家！」