兩個半月冇見！李旻芳黃耀英機場擁吻落淚

藝人李旻芳（Lucy）與男友黃耀英（Darren）一向恩愛，早前Darren長駐內地拍劇集《包青天再起風雲》，兩個半月冇得見面，真係掛死對方！呢日，Darren終於回歸喇，Lucy興奮到突襲接機送驚喜畀對方添！只見Lucy素顏上陣嘅一身街坊裝但就眼鼻通紅，原來佢開心到喊呀！佢仲親自整咗「Welcome Home」嘅字牌，畫上男友嘅Q版人像勁有誠意，怪唔之得Darren表現驚喜，仲忍唔住錫錫同攬實佢添，So Sweet！

黃耀英讚女友完美

事後Darren接受東網訪問時，表示事前得悉女友會嚟接機，但一直扮唔知情：「雖然我估到Lucy會嚟接我，但見到佢嗰刻非常感動。從來未試過有人咁樣嚟迎接我，為我做咁多嘢，所以我好多謝佢，佢真係一個好完美嘅女友嚟！」Darren仲話喺內地拍劇期間，Keep住同女友每日視像通話，又會拍搞笑片氹佢開心，相當識做！

李旻芳忍唔住喊

Lucy受訪時亦透露：「其實接機當日我要趕住開工，但都抽時間去機場，希望畀個surprise佢。事前我仲呃佢話要開工嚟唔到，不過當然係呃唔到啦，然後我見到佢一出嚟就忍唔住喊，因為真係太耐冇見面。但當時其他藝員同事喺附近望住我喊，有啲尷尬。（Darren有冇感動到喊？）佢本身見到我都想喊，但因為太多人而忍住。」