三度封金曲獎歌王　陳奕迅忍唔住嗌勁！

三度封金曲獎歌王兼勇奪「年度專輯獎」的陳奕迅（Eason）今日回港，現場有數名歌迷接機，以全黑打扮配黑超的他，於傍晚約6時40分步出機場，全程面露微笑之餘，仲企定定畀記者影相做訪問，心情靚爆！

自嘲命中率低

問到三度封王心情如何？Eason表示好開心、又受寵若驚，聽到獲獎一刻都好愕然：「今次係第二次親自去拎獎，本來都諗住冇獎拎，前幾日經理人都話我（拎獎）機會唔大，所以都冇壓力。」冇期望之下獲獎更開心？Eason笑話：「台下未識反應，上台認知現實先亂嚟想唱歌，香港人三度封王原來幾勁㗎！」他又打趣話自己「命中率」只得三成好低，九次提名獲獎三次：「台灣歌手殷正洋三次提名三次都拎到，不過計番，我次次出碟都有提名。」

唱片係香港製造

問到會否開騷回饋歌迷？Eason話想做好準備先，最快2019年開騷，講到罕有於第一輪票選就高票勝出，他謙虛指自己是被動，再次感謝台灣專業評審員的肯定：「香港人可以喺大中華區得獎，好有代表性，多謝佢哋嘅讚美。」同時亦戥《C’mon in~》製作人Jerald入圍「最佳專輯製作人獎」感到高興，又自爆大碟後期製作是於土瓜灣錄音室完成：「成隻碟都係香港製造，自己都好自豪！其實拎到『年度專輯獎』都好驚喜，以為自己冇資格，原來呢個獎係幾百隻碟入面再揀。」

返屋企最舒服

最後問到會如何同家人慶祝？Eason發揮搞笑本色，笑話剛於Instagram見到太太徐濠縈「斬料」，但未知是否同自己慶祝：「可能係慶祝阿女考完試放假，要返到去先知。（食煮家飯慶祝溫馨啲？）我成日都返屋企食，最舒服！」說畢就有歌迷送上香檳，Eason接過後就離開機場。