東網電視
更多新聞短片
Miss Chu（右）啲金句好正！
1/3
前港姐朱千雪同岑杏賢係好姊妹，仲一齊主持節目《心理急救室》為少男少女解決煩惱。Big Big Channel專頁上載咗一段短片，內容關於一位17歲嘅少女因為驚自己冇拖拍而向兩位靚女求助，千雪即化身做「Miss Chu」教路，過程中仲爆出唔少金句！
片段開始嘅時候，岑杏賢就話：「佢係一個準備升中六嘅17歲女仔，見身邊好多同學開始拍拖，自己仍然係A0（Available 0）。」呢個時候，Miss Chu即刻解釋「A0」係點解，即係單身兼未拍過拖，之後Miss Chu一臉認真話：「我覺得未拍過拖唔係一件唔好嘅事，我唔理解亦唔認同呢種年輕人嘅心態，你結婚都係揀一個，完全唔覺得之前拍過十次拖係叻啲囉，你話10A就叻啲啫！」
之後Miss Chu繼續金句王上身：「以前嘅年代啲人係好鍾意啲冇拍過拖嘅女仔，17歲未拍過拖驚咩？有個28歲未拍過嘅都唔驚啦，你驚咩？女仔拍拖quota（配額）唔多，我唔會因為要Experience（經歷拍拖）而去嘥呢樣嘢。」岑杏賢亦表示：「其實佢講個重點出嚟，係想有人關心同錫佢，其實有父母錫都係被愛緊。」最後Miss Chu總結：「唔好受社會壓力影響，唔好覺得呢樣（拍拖）係需求。」
網民有話兒：
Hexxx：千雪講野（嘢）好有POINT！
Ruxx Laa：依家啲人十七歲都已經A10
女xx：12歲已經拍拖啦。
Graxx Lam：哈哈，Miss Chu好正！
不過Miss Chu唔知咩叫「A0」。
岑杏賢（左）就解釋「A0」即係「Available 0」，指單身兼未拍過拖。
