東網電視
更多新聞短片
西洋菜街令人留下很多回，娛圈亦有很多活動在這舉行。
1/15
有18年歷史嘅旺角行人專用區西洋菜街正式殺街，好多電影劇集曾經喺度取景拍攝，唔少紅星都留低過腳毛，你又記得幾多？
杜汶澤當街沖涼畀人圍
2009年，影帝張家輝拍攝電影《旺角監獄》時就喺呢度取景，當時佢係鬍鬚Look，而且逗留時間唔長，但影帝魅力唔嘢少，吸引幾百人圍觀，之後家輝都有再嚟旺角宣傳電影《激戰》。
2011年，阮兆祥、王祖藍、李思捷拍攝《勁抽福祿壽》，喺正戲院門口拍擂台摔角戲，夠晒大堆頭，仲有林雪、張可頤、陳法拉，現場咁多明星，自然又有大把人圍觀，免費做埋電影臨記睇比賽。
2012年，鍾嘉欣同陳智燊拍攝劇集《幸福摩天輪》，嘉欣BB咁受歡迎梗係畀人圍啦！陳智燊仲擒上紅綠燈拍攝添！
2013年杜汶澤喺街頭沖涼，由着住泳衣嘅夏尉喻（Barbie）傍實拍攝電影《黑色喜劇》，但因圍觀者太多而有警察到場了解。
「胸」襲旺角派避孕套
因為人流夠多又夠集中，唔少電影都嚟旺角行人專用區拍攝同宣傳，輕易吸引大批市民圍觀，廣收宣傳之效！記得周秀娜、陳靜、陳偉霆、衛詩雅、周柏豪、杜汶澤、連詩雅、鄧麗欣都嚟過宣傳谷戲，次次都逼到條路水洩不通！
不過，亦有一啲藝人會當街露肉搏版面，2012年當時仲係周秀娜男友嘅陳偉成就赤膊上身，同着住泳衣嘅「模媽」Mia（陳靜儀）為品牌宣傳。2013年，組合FFx（唔係900蚊拍MV嘅四人版，係再早嘅版本）六位成員着住泳衣喺旺角鬧市行Catwalk宣傳寫真。做慣騎呢嘢嘅艾美琦當然都有殺着，試過喺旺角派安全套谷寫真。至於AV女優周防雪子同水菜麗都先後「胸」襲過旺角，一眾宅男逼住圍觀，出晒汗撐女神㗎！
龍小菌「除罩」惹騷動
講到旺角行人專用區，一定要講下Busking文化，C AllStar喺2010年開始每星期喺度演唱，歡迎市民即場點唱，愈唱愈紅唱到入紅館。龍小菌2012年以蒙面歌手Look喺在旺角街頭獻唱，因為唔想影響當時教師嘅工作，所以選擇笠頭，至2013年龍小菌喺旺角「除罩」以真面目示人，獲讚貌似苟芸慧。星夢娛樂歌手譚嘉儀（Kayee）舊年穿貼身裙喺旺角玩Busking，但就發生唔開心事件，疑遭南亞裔男子非禮，最終要報警。
----------------------------
東網巨星開咗ig喇，大家快啲follow啦！
影帝張家輝於2009年拍攝在西洋菜街拍攝電影《旺角監獄》。
龍小菌「除罩」掀起騷動。
杜汶澤喺街頭沖涼，由着住泳衣嘅夏尉喻幫佢沐浴。
陳靜「胸」襲西洋菜街。
陳偉霆畀人圍。
王祖藍、阮兆祥、李思捷在西洋菜街拍攝《勁抽福祿壽》。
龍小菌被讚貌似苟芸慧。
2012年，鍾嘉欣同陳智燊在西洋菜街拍攝《幸福摩天輪》。
水菜麗拋谷戲。
陳偉成赤膊上身，同着住泳衣嘅「模媽」Mia為品牌宣傳。
2010年C AllStar喺西洋菜街Busking，最後唱到紅館。
譚嘉儀在西洋菜街谷歌，疑遭非禮。
2012年，周秀娜帶隊入西洋菜街谷戲。
艾美琦派避孕套。
