唔急減磅　陳倩揚囡囡滿月最緊要搞「糧倉」

育有兩子嘅前港姐陳倩揚上月再誕下女兒陳希桐，一家五口幸福滿瀉。倩揚呢日就喺社交網分享希桐滿月派對嘅相，相中見到倩揚抱住一身粉紅色裝束嘅希桐，畫面有愛，佢仲為愛女預備咗一個好精緻嘅兩層高蛋糕，上面仲有一對粉紅色BB鞋嘅造型喺蛋糕上，簡直靚到爆！<br/><br/>倩揚就話囡囡好聽話，所以呢個月都算輕鬆過度，仲話雖然休息唔夠，但見到囡囡健康成長已經好滿足：「每次同妹妹換片片或洗白白時，見到逐漸build up嘅肉，媽媽即刻覺得就算幾眼瞓、膞頭肩頸幾痛都抵嘅！呢一個月完全跟足陪月姨姨嘅坐月食療，每日三餐、湯水、代茶、燉品等等絕無欺場，未諗過『減磅』呢兩個字，最緊要養好身體，建立好妹妹嘅『糧倉』，減肥並不急於一時嘛。」倩揚仲話下個月就會逐漸復工添！