猛料藝術世家！司徒頌曦最愛《古惑仔》

荷里活新星司徒頌曦（Hayden Szeto）雖然係「竹升仔」，但原來他自細就睇港產片長大。在芸芸港星當中他最喜歡就係周星馳、梁朝偉同黃秋生。除了睇周星馳電影長大之外，Hayden亦表示《古惑仔》系列對他影響好大。而他更透過影片而獲「身份認同」！

睇《古惑仔》搵歸屬感

他說：「嗰時細個，雖然父母係香港人，但自己喺加拿大土生土長，好似冇咗香港人嘅身份。首次睇（《古》）嘅時候首次接觸香港黑社會原來係咁，亦知道原來香港係咁樣。香港喺片中都係一個角色，例如片中提到嘅地方如藍田、銅鑼灣，雖然聽過但自己未去過，喺戲入面見到，覺得好特別！睇嘅時候有種歸屬感：『原來我都係香港人！』所以我好鍾意！」Hayden仲話當時土生土長或移民嚟加拿大嘅後生仔個個都跟陳浩南留長頭髮。而他覺得戲入面最有型係陳浩南，無論係鄭伊健或前傳的謝霆鋒，他都覺得相當有型。Hayden表示如果對個角色有興趣，他都想拍吓港產片。

藝術世家

生於藝術世家的Hayden，父親是中國著名畫家司徒乃鍾，而祖父亦屬猛人，他是中國著名嶺南派畫家司徒奇，至於曾祖父則是中國著名詩人司徒枚。Hayden表示年幼時父親都有教過他畫畫，不過他發覺自己唔能夠「坐定定」就放棄。而每當他坐唔定學畫的時候，父親就會帶他睇戲。而他亦漸漸愛上電影！他說：「記得當時父親帶我去睇湯告魯斯（Tom Cruise）套《壯志凌雲》（Top Gun），當時我覺得演員份工好似幾好玩，可以演唔同角色，於是我就立志做演員！」