孖Lee Pace去「滾」食豬腸 張曦雯成功抄牌

20181103
東網電視
更多新聞短片
唔知Lee Pace最尾有冇食到豬腸呢?
邵氏網劇《飛虎之雷霆極戰》除由黃宗澤(Bosco)及苗僑偉等擔演外,荷里活型男Lee Pace今午亦投入拍攝工作。這位型男魅力十足,現身中環碼頭開工時頻和工作人員雞啄唔斷,與女主角之一的張曦雯(Kelly)更甚有交流。當他完成戲份登車離開時,手攜大紙袋的Kelly即送上禮物,此時探頭入車廂的她與Lee及其助手閒聊,然後取出電話,相信已成功「抄牌」,可謂「恨死隔籬」!
Lee Pace豬腸都想試
Kelly對Lee讚口不絕:「同佢去打邊爐,估唔到佢樣樣都食,即使豬紅及豬腸都話要試,仲食得好開心添。」從外國返港發展的Kelly扮演特工,與「上司」Lee對手戲頗多,二人亦可謂「同聲同氣」。Bosco亦指Lee為人親切:「佢份人好nice、幾得意。之前大家已經介紹咗認識,相信今次合作會好愉快。」
另外,Kelly與Bosco首結戲緣已有感情線,不過暫時親熱戲欠奉。Bosco笑謂:「遲啲就未知,劇本未出到呀。今日都有個擁抱嘅,幾十歲人仲學人兩小無猜,哈哈!Kelly係女神呀,我驚佢啲粉絲呷醋。」
劇情交代Bosco為救Kelly而視力受損,故他要全程戴上太陽眼鏡:「其實今次我係最多打戲嘅1個,不過已經較上集拍得輕鬆。上次大熱天時要着晒全套飛虎衫,依家都秋天啦,點都冇咁辛苦。(特工Kelly一齊打?)佢只係負責化身OL『色誘』人咋。」