拍《愛．回家》衝出香港　馬貫東獲粉絲慶生

藝人馬貫東（Mark）日前（8日）32歲生日，萬千寵愛在一身嘅佢，除咗有班《愛．回家之開心速遞》演員同事為佢慶祝，佢嘅Fans Club更專誠為佢籌備咗個難忘生日會，仲有來自其他地方嘅粉絲，睇嚟《愛．回家》真係好受歡迎噃！

佢好多謝一班幹事嘅精心策劃，仲話今年生日會相當有新意：「今年比較特別，我哋冇玩遊戲，但係有一個問答環節，我哋坐喺度傾偈畀fans了解我多啲，同時我亦都了解多咗啲新會員，仲發現有內地同澳門嘅fans，嗰陣我哋就好似一班朋友喺度敍舊咁，互相鼓勵同支持，成個感覺好warm。最驚喜就係Fans Club親手整咗個獨一無二嘅生日蛋糕畀我，同埋佢哋真係有聽我講，捐錢去慈善機構，再將捐款收據送畀我做禮物，多謝佢哋咁有心。」佢續指會繼續努力，希望來年會有更多粉絲朋友。