五位大熱跑出！邊個最似「廣告女皇」？

ViuTV選秀節目《Good Night Show廣告女皇》自播出以嚟，引起唔少網民熱烈討論。而今晚即將誕生最後4強，不過節目未播出，網民已經揀定5位心水人選，認為佢哋最大機會進入決賽，成為新一代「廣告女皇」。其中，木村拓哉家族嘅劉思琦同擁有導彈級上圍嘅黃丹虹最受熱捧。<br/><br/>劉思琦<br/><br/>劉思琦（Kayze）外形亮麗，一直被視為熱門人選，有唔少網民更笑指佢係蔡思貝胞妹同日本男神木村拓哉嘅失散女兒。模特兒出身嘅Kayze之前喺節目中被擔任「製片」嘅詹朗林點名睇好能入前三甲，更大讚佢係「零死角美女」。目前佢嘅個人社交網有近1,5000人追蹤，被網民封為網絡女神，有豐富幕前經驗嘅Kayze被指最有機會跑出、成為「廣告女皇」。<br/><br/>黃丹虹<br/><br/>23歲嘅黃丹虹（Vky）擁有35G導彈身材，憑住其逼爆上圍，成功喺一眾參賽者中「凸」圍而出。佢曾喺網上分享脫脂血淚史，更晒出多張往日肥妹相，令人聯想到《全民造星》中「肥仔大翻身」嘅姜濤。Vky最高峰時體重達140磅，後來喺五年內減至120磅，期間因為服用減肥產品而痾到七彩，最後全靠做運動再搣甩20磅。不過最令網民關心嘅係，佢瘦身唔瘦胸，減肥後並冇降「Cup」。<br/><br/>劉展翹<br/><br/>24歲嘅劉展翹（Jackie）雖然年紀輕輕，但能力非常全面，依家同朋友組成兼職YouTuber ，亦曾拍過唔少電影、廣告同MV，被認為潛力十足。此外，喺第五輪淘汰賽中，陳子豐同其他淘汰者都力撐Jackie奪冠。<br/><br/>陳亭嘉<br/><br/>29歲嘅陳亭嘉（KaKa）係參賽者中唯一一位人妻兼人母，她畢業於無綫第24期藝員訓練班，後來佢因競爭太大而離開無綫，轉行做瑜伽老師。雖然KaKa已經生咗個仔，但熱愛運動嘅佢身材保持得好好、零師奶味！<br/><br/>小神經<br/><br/>90後嘅小神經（Chloie）外形甜美，佢不時喺個人YouTube頻道發布原創歌曲同翻唱歌曲，其中一首原創歌曲仲得到唔少網友關注，影片總觀看人數超過18萬，被網民封為「音樂小才女」。