【10年友誼】王君馨賀舞伴俞灝明生日

講起藝人王君馨（Grace），相信唔少人都諗起佢2008年喺《舞動奇蹟》第二季奪冠封「舞后」。眨吓眼咁就過咗10年，但原來Grace同當年喺節目組成「小明星組合」、齊齊攞冠軍稱王嘅內地男星俞灝明仲keep住有聯絡，認真夠長情。

尋日（14日）係俞灝明嘅生日，Grace都有同佢慶祝，仲喺社交網留言：「親愛的Hamburger，很高興今年可以跟你慶祝生日。10年了，看着你一年一年這樣成長，愈來愈成熟穩重，對做戲又有更大的熱誠。知道你的成就將會愈來愈大，但只希望你每一天都可以過得開心快樂，不要給自己太多壓力。在這裏祝你生日快樂，身體健康，永遠都做一個最純真，最可愛的自己！」令唔少網民都話呢個組合好經典。其實佢哋上月都曾經「合體」，當時Grace都有甫出合照，仲留言話一齊為下個10年加油添！