三年抱兩！阮民安老婆意外懷孕佗豬仔

組合E-Kids成員阮民安（Tommy）跟太太張倚雯（Eva）育有一個囝囝阮治童，已經歲半大，據知Eva又有喜，已經有五個月身孕，兩人三年抱兩非常開心，Tommy接受東網訪問：「係呀，我哋再有小朋友。（恭喜晒）多謝！係好開心。（係咪計劃之內？）雖然冇預計嘅，但我哋有三年抱兩呢個諗法，尤其是童童出世後好開心，我哋又鍾意湊小朋友，佢出世後我哋發展又唔錯，今次知道再有BB，覺得係個天送畀我哋嘅禮物。」<br/><br/>他又爆太太再次佗仔，他笑說：「兩兄弟爭玩具、打架，我預期晒有呢啲畫面，其實初初有少少擔心，好驚BB會趕住喺狗年新年前出世，因為中國人有成語『雞犬不寧』，雞年生咗童童，如果細佬搶閘狗年出咗世，好驚將屋企翻轉，依家check咗太太預產期係明年3月尾，過咗農歷新年，應該會係豬仔，希望佢哋可以相處融洽。」<br/><br/>今胎佗得辛苦<br/><br/>Tommy表示太太今胎佗得比較辛苦：「佢第一胎想食就食，想瞓就瞓，佢做mode做嘢影相可以自己控制時間，但今次初初冇諗到實在個困難喺度，因為個仔得歲半，仲係好百厭，好多時要照顧佢，佢成日跑來跑去，你一坐低佢就抆你起身要周圍行，佢成日搞住我老婆，當然都有搞吓我，發現原來佢佗第二胎時候，未必可以休息得咁好情況，所以今佗係辛苦少少，但佢依家慢慢習慣緊，我又幫佢多啲，因為上一胎佗佢未有小朋友，我只係負責佢起居飲食，舒舒服服就得，今次就要照顧囝囝多啲，沖多啲涼，家務做多啲，等佢可以休息、瞓多啲。」