【嘟嘟爆料】「汪阿Tag」原來係咁嚟！

因為一個Tag而成為IG紅人嘅汪明荃（汪阿姐），引領全城熱玩「汪阿Tag」，喺相片上用手寫人名當tag，大家跟還跟，但知唔知點解阿姐當初要咁tag人先？鄭裕玲（嘟嘟）就喺節目爆料，原來係因為汪阿姐開咗IG之後，唔少人都叫佢合照後hashtag番佢哋，但阿姐就話：「唔係想領導潮流，成日畀人叫hashtag，我都唔知咩叫hashtag！」而阿姐本身就有個「明荃之友」網站，公務繁忙嘅佢不時出席政商界活動，會同唔少名人合照，所以佢一向都會咁樣落名畀「明荃之友」搞手認人上載照片，所以就索性咁樣喺ig「tag」人喇！

嘟嘟仲話阿姐親力親為，當日夜收工，阿姐就話返屋企「Tag」，點知搞到凌晨點幾兩點！正所謂「活到老學到老」，阿姐依家玩IG玩到出神入化，仲識得tag「我就是ig紅人」，緊貼潮流不特止，識玩一定係做Leader！