360度啜爆歐陽巧瑩!林師傑眼濕濕震晒

2018年11月22日 19:04
東網電視
更多新聞短片
林師傑啜爆歐陽巧瑩,Sweet到暈!

星夢歌手「木偶哥」林師傑與拍拖將近四年的藝人歐陽巧瑩結婚,並於尖沙咀The Mira酒店筵開卅五席宴請親朋。今晚一對新人在兄弟姊妹團陪伴下,現身接受傳媒訪問,身穿透視大露背婚紗的歐陽巧瑩明艷照人,並在傳媒要求下,與新郎哥林師傑360度轉住錫足一分鐘,之後,林師傑更深情望住歐陽巧瑩講:「I Love You!」然後抱抱,冧到痺!

談到今日沒有接新娘環節,林師傑為此解說:「今日最重要嘅環節叫『瞓晏啲』,因為想大家開心同可以分享呢個喜悅,我都知大家好忙!屋企人又好好,唔使我哋跟足傳統,所以冇接新娘環節。今朝我哋都六點先瞓,瞓到十二點,要去搞座位表嘅嘢,因為好多調動,但過程都算順利。」

而歐陽巧瑩大爆新郎哥林師傑好緊張,心跳得好快:「我哋拍拖四年,都冇見過佢咁緊張,攬住佢嘅時候,覺得佢成身震晒同好熱,同埋佢話畀我聽佢好緊張同想喊,頭先一開始講嘢就嚟料(指喊),第一次見到佢咁,好得意!佢個樣好尷尬同手足無措,好搞笑,但我當時都有啲眼濕濕。」林師傑則笑言:「一直都聽人講搞婚禮好大壓力,同埋自己一向都好怕麻煩人,好多嘢都會安排好晒,想大家舒服啲,今日見到大家為咗我咁忙,好感動!」

歐陽巧瑩直言因婚宴場地問題,有些朋友未能安排前來:「請咗好多朋友,但因為場地問題,地方有限,最後有啲朋友請唔到,自己都唔知點開口,好彩大家都好體諒,好多謝大家。」問到今晚會否有表演?林師傑表示:「會,我寫咗首歌叫《美麗的妳》送畀太太,但只係寫咗半首,因為下半世未過完,兄弟團之一嘅譚俊彥會彈結他。(打算講甚麼愛的宣言?)知道自己多嘢講,安排咗上菜後先會講,希望都盡量精簡。」

談到生仔問題,問兩人會否婚後不設防即生B?新娘子表示:「唔想咁快做媽咪住,兩年後先,都明白有仔趁嫰生,但想過吓二人世界先。」而在旁的林師傑亦表示:「等我儲多啲錢先,依家有啲抆水,大家都喜歡小朋友,一仔一女都好正!自己好擔心小朋友讀書嘅問題,但我事業暫時未起飛得好好,有小朋友要花好多時間去陪佢哋,好似屋企人培養我一樣……」說到此處,林師傑有點感觸想喊,歐陽巧瑩即笑言:「好搞笑!」

----------------------------
東網巨星開咗ig喇,大家快啲follow啦!
https://bit.ly/2JjSVcr