無敵急口令！張衞健16秒讀116隻字

無綫劇《大帥哥》即將播出，主演仲係久未拍香港劇集嘅張衞健，令大家相當期待！張衞健次次拍劇都會有令人無限loop嘅急口令，今次張衞健當然要再show off吓，仲廣發英雄帖，搵網民挑戰佢口技！

張衞健着住《大帥哥》嘅帥服，拍片叫大家只要對講嘢速度有信心，就嚟挑戰佢嘅《大帥哥challenge》，佢話：「我會用我三部劇嘅對白串連成一個急口令，你哋清楚嗡完佢，有信心快得過我、勁過我、型過我、chok過本大帥就過嚟，勁到噴晒汁嗰位，有機會贏得大帥哥一比一全高清親筆簽名相一大張，快啲拍片過嚟！」

張衞健仲即場示範咩叫快狠準，佢開Turbo只係用咗16秒，就講晒挑戰內容：「如來佛祖玉皇大帝觀音菩薩指定取西經特派使者花果山水簾洞美猴王齊天大聖孫悟空呀！型到跌渣！涼風有信，秋月無邊，虧我思嬌嘅情緒，好比度日如年，雖則我唔係玉樹臨風，瀟灑倜儻，但我有廣闊嘅胸襟，加強勁嘅臂彎。我攀過的斜坡已經太多太多壯膽記得唱歌咪講咁多放-馬-過-嚟！」16秒讀出116個字，平均每秒讀到7.25個字，真係屈機！

網民的話：

JaXX：完全没有老到！聽到這把聲音就是開心！

CathXX：我唔想要紙板，想要佢真人！

axxie：邊有人快過佢！