《大帥哥》NG片笑到噴汁！張衞健玩出櫃？

等到頸都長，《大帥哥》尋晚終於首播喇！唔知大家有冇捧場呢？觀眾話晒「餓」咗張衞健咁多年，除咗「張衞健式」金句外，當然就係要睇佢嘅好笑又浮誇嘅演技啦！尋晚TVB就喺社交網上載咗一段《大帥哥》絕密NG片，真係笑到噴汁！

片段一開頭，就係張衞健大騷佢嘅金句話自己唔係型到跌渣，係型到噴汁呀！跟住就開始播出NG片段，首先係佢同蔡思貝嘅一場戲，張衞健講對白時食螺絲「我女人不求同年同日生，但求同年同年同日死」。畫面一轉張衞健竟然出櫃？原來佢係讀錯對白將「異性相吸」說成「男性相吸」跟住張衞健自己都大笑：「哎呀！我今日出櫃喇！畀人知道咗添！」

唔好以為張衞健淨係喺劇中多金句，原來佢私底下同樣風趣幽默，劇情講到蔡思貝要開燉盅蓋，張衞健突然爆肚話「你想思貝一嚟開蓋定一嚟釘蓋？」惹得全場工作人員爆笑！

網民睇完第一集後，都大讚好好笑仲封張衞健做視帝，不過都有人話「所謂金句？多了就係垃圾了........」其實只係播出咗一集，大家不妨拭目以待。