曖昧對話流出！黃子恆三次邀35E迪子開房

無綫藝人黃子恆被爆偷食國產粉絲，對方更自稱懷有其骨肉！色字頭上一把刀，今次桃色風波令他隨時賠上事業，其實佢早就有前科，兩年前曾介入歌手裕美婚姻，裕美更被拍得在男方寓所露台晾Bra，原來裕美之後，佢都睇中擁有35E胸器的歌手迪子，曾經喺半年內先後約過迪子三次，氹對方去佢屋企「提供服務」。

有關兩人在朋友圈中曖昧對話截圖流出，當迪子拒絕佢要求，佢仲好鬼冇品爆粗鬧人，但隔咗幾個月佢又搵新藉口，話邀迪子去佢屋企玩big big channel live唱吓歌仔，但迪子見佢將個琴放喺床尾，迪子都唔係蠢當然冇應約，之後佢就冇再搵迪子。

迪子承認確實有件咁嘅事，直認嬲對方唔係男人，對人基本尊重都冇。迪子接受東網訪問，她表示與對方認識十幾年，對方一直好正經，直至她一個玩SM Feel的MV出街後，對方才有所行動，她說：「佢開始Send啲奇怪嘢畀我，仲約我去開房，我唔知佢講笑定認真，梗係冇去，佢成日扮深情同正經，有時我都諗係咪誤會咗佢，但睇到佢疑搞大粉絲個肚，我覺得做朋友要帶眼識人。」

人魔大戰　之後約戰九龍塘

根據迪子和黃子恆的對話截圖，見到男方前年萬聖節想約迪子去開房，其實前年6月黃子恆才被爆偷食人妻裕美，想不到4個月後就有新目標。當時拍緊《降魔的》的黃子恆認真入晒戲，打算想約迪子出來玩「人魔大戰」，並說：「依家出面啲細酒店都好平，但我驚我咁夜先入去佢要我身份證登記。」之後就提議去九龍塘，但迪子表示自己對SP（sex partner）關係沒有興趣而拒絕。對此，迪子坦言覺得黃子恆不尊重女人，亦謂對方有需要應該去「撳鐘仔」：「呢啲錢都要慳。」