輸晒！楊秀惠爆張衞健親身示範點姣仔

藝人楊秀惠出席「《大帥哥》之徵兵大會」，講到她劇中角色「艾妞」發晒姣，她笑言：「一開始係難以接受，睇番嗰場姣大帥哥（張衞健）場戲都頭痛，頂唔順，但冇辦法，每次化妝心理壓力都好大，但身為演員就要做好佢，極力說服自己就係『艾妞』，雖然都有少少抗拒個頭同妝，但出嚟效果搞笑就得。」問到之後可會有跳艷舞的場口？她表示有幾場戲都要跳舞：「有啲戲係大帥哥教埋我要一路唱歌一路跳舞同摸人，第一場蜘蛛精戲就係我引誘佢，但之後我要引誘其他人，佢都有教我可以點行，隻腳可以點。佢行一次畀我睇，估唔到佢可以咁女人，多謝佢咁幫我。」

講到與張衞健合作，她大讚對方講嘢及反應很快：「又會教我哋攞重點，邊啲位好笑同埋點樣掌握對白節奏，有一句對白我要『耶』，佢叫我之後都keep住『耶』，直至依家我姪仔打畀我，佢都會學我咁講『耶』，最緊要可以娛樂大家。」