相隔14年!胡定欣「出山」同古巨基續前緣

20190109
東網電視
更多新聞短片
胡定欣同古巨基相隔10幾年再合作!
歌手古巨基(基仔)新歌MV《亂世情侶》於昨日(8號)出街,今次MV女主角搵嚟老拍檔胡定欣演出,二人對上一次合作原來已經係14年前,當時定欣就為基仔《愛與誠》MV任女主角。講起往事,佢哋兩個都互笠高帽,大讚對方完全冇變過,基仔同定欣講:「好特別呀個感覺,我哋頭先傾偈,都話眨吓眼就過咗咁多年。所以可以再邀請你嚟拍我嘅MV,我係非常開心。佢拍劇時間好忙,好耐冇為人做MV女主角,所以我喺度要特別多謝佢。好多人所講嘅『回憶殺』,我諗我哋今次再拍MV就係喇。」
MV講述一對情侶大家為咗儲錢計劃結婚,各自忙碌工作令感情生活麻煩,女方返office經常OT、男方就係倉務員返通宵班,睇落好似一齊計劃將來,但係其實忘記咗身邊嘅人。最後有所領悟的基仔跑去定欣公司搵佢,一個touching嘅結局。基仔話:「為咗計劃將來,但忘記咗依家,忘記咗兩個走埋一齊嘅最初意義,所以呢隻歌加埋呢個故事,係一個愛情上幾大嘅感觸嘅故仔。」定欣亦有感而發:「唔單止係返office工有咁嘅情況,其實我哋做呢行都係,冇日冇夜,好多好重要嘅moments或者好似首歌講嘅人與人之間最緊要嗰樣感情、過程中緊扣嘅感覺缺乏咗。」
喺office拍攝仲勾起咗:定欣入行前嘅回憶:「我做過兩年秘書先至入行。」而今次拍攝MV,係佢「出山」之作:「我舊年5月做完舞台劇之後,就冇做過戲啦!所以今日係我第一日返工,哈哈。我頭先都覺得係時候pick up番。」
基仔仲親自執導MV,每拍完一個shot,佢都會睇playback,定欣話:「今朝喺車上面聽佢講時,我已經好有畫面、好感動,可能因為人大咗、或者經歷多咗,對呢啲事會好感受到。」基仔亦不忘大讚對方演技一流:「有好多場戲定欣都係一take過,而且有幾個位我都睇到眼紅紅。」