23歲日女星與父共浴　香港星爸媽點樣睇？

23歲日本女星北見直美近日在節目中公開與父親及哥哥共浴的片段，「禁室澡育」肉帛相見享天倫，引起極大回響！

陳琪鬧爆博出位

本地一班星級父母亦不能接受！育有兩女一子的藝人陳琪直斥有人博出位：「簡直係匪夷所思！我覺得嗰位女星嘩眾取寵，想做一啲好出位嘅嘢，我真係接受唔到！我個大女依家9歲，就算6、7歲時已經好避忌唔會一齊沖涼，老公（藝人胡諾言）幫手沖得最多係細仔，囡囡就較少，始終男女有別。就算囡囡去廁所，都絕對唔會叫佢跟爸爸去男廁。」

林盛斌「禁浴」

至於育有三女一子的「多仔公」林盛斌，長女現已10歲，幼子亦1歲半，他坦言向來奉行「禁浴」：「從來冇試過同三個女一齊沖，就算幫佢哋沖都冇！因為我同太太都話佢哋知，身體有重要部位，需要自己好好保護，唔可以隨便畀異性睇到，所以我哋冇父女沖涼嘅習慣。如果個仔大個啲，我同佢一齊游水、換衫、沖涼就冇問題，因為大家係男人。」

有三個寶貝仔的女星羅霖同樣指不能接受：「3、4歲都可以，增進吓親子關係，但逐漸大個懂得兩性唔同時就要分開。」

黎耀祥：文化不同

身為廿四孝父親的男星黎耀祥，寶貝仔黎正橋已21歲，對父女共浴認為是文化不同：「我諗中國人比較保守，日本文化都有男女一齊浸溫泉，呢啲係日積月累嘅文化，如果習以為常就唔會覺得係啲咩！我個仔到十幾歲唔會同我哋沖涼，只係幾歲時一齊沖。」