李準基自讚靚仔　粉絲邀上屋企

將於明晚假亞博展開亞洲巡迴騷的36歲韓星李準基，今晚率先現身鑽石山的荷里活廣場舉行發布會造勢，吸引大批粉絲捧場。

西裝骨骨的他甫現身便以廣東話打招呼說：「大家好，我係李準基，好掛住大家！係唔係好掛住我呀？」又以英文表示好開心再來港，大讚主持同港迷靚女及狂呼：「I Love U」全場粉絲即發出震耳欲聾的尖叫聲 ，他又嗌粉絲：「大聲啲，多謝多謝！」兼大派心心，並即場學講廣東話：「香港包羅萬有」及「李準基好靚仔」。當聽到全場粉絲大嗌「李準基好靚仔」，他便以廣東話回覆說：「真心多謝大家，心心、感動」兼大派飛吻。

相隔兩年再舉行港騷的李準基，坦言感抱歉未能早一點再來港，他又着粉絲推介香港美食，但有粉絲即趁機邀他到訪自己屋企，李準基十分識做，笑言也想去粉絲家home stay體驗香港文化，還笑說很樂意留港一段長時間。

年輕時看過很多香港動作片的李準基，表示最近迷上武術，希望有機會跟香港導演及演員合作。他又謂知道粉絲想他再拍浪漫喜劇，他笑說趁自己樣貌還可以時會盡快拍多部愛情劇。

而為慶祝李準基下月生辰，香港粉絲以偶像名義捐款行善，主持即場將慈善捐贈證書轉交予李準基。完場前他更特地走下台跟粉絲大合照。