捱足3年！《東張》李旻芳出頭天坐廠做主播

主持《東張西望》而為人所熟識的李旻芳，捱了三年多，終於有機會做主播坐廠喇！剛於周日人生第一次正式做主播，佢開心表示：「心情係極度興奮同開心，因為我一向都知道自己喺演藝條路想點行，所以一入訓練班，我哋嘅導師旦哥（鄭丹瑞）問我哋嘅目標係咩，我由第一日已經好明確咁同大家講：旦哥同嘟嘟姐（鄭裕玲）係我偶像，係我嘅role mode，我想有朝一日可以好似佢哋咁！做到一個受人尊敬同愛戴嘅金牌司儀！所以真係非常感激一直好照顧我同保護我嘅監製，好多謝畀個機會我，向住我嘅目標邁進咗一大步！」<br/><br/>對於第一次完廠，不少人讚佢夠淡定，但實情佢當日超級緊張，一直抖大氣兼坐唔定。佢笑言：「好彩當日嘅partner Patrick Sir（林溥來）一直都帶住我！教我點記稿同計時間，仲話需要對稿嘅話隨時出聲，真係好感動。」節目播出後，佢不忘多謝男友黃耀英，原來前一晚已幫佢對稿，開廠之前一個鐘，又再對多次，仲有唔少留言支持佢，難怪咁定啦！