咪嘴事件被網民圍插　曾樂彤游學修道歉

早前歌手曾樂彤出席頒獎禮時，被網友質疑咪嘴，佢即喺社交網否認，但因為一個hashtag「micnlm」，令網友聯想到係粗口諧音，所以圍插佢。而男友游學修見狀即護花，力撐對方冇咪嘴，點知繼續惹嚟惡意批評，事隔一日，兩人都分別喺網上道歉！

曾樂彤喺IG發文，未知係咪因為「micnlm」，但就為失言道歉：「我為自己係（喺）網絡上失言而道歉，就算情緒有幾激動，都唔應該係（喺）公眾平台，隨意發表唔恰當既（嘅）詞語，希望大家原諒我當刻有情緒，係（喺）自己嘅平台發洩自己嘅感受，經過今次呢件事，我好好上一課，好後悔自己因為一時衝動，去做咗一件錯嘅事，吸取教訓後我會學識好好去控制我自己嘅情緒，我真心同大家講聲對唔住，希望大家接受我嘅道歉。」

游學修除咗道歉，更指日後同工作無關嘅嘢會慎言，長文如下：「1.在此認真地向公眾道歉，對不起。真性情不是免死金牌，眼見有一直支持我的觀眾今次也表示失望，你們的說話我清楚接收到，認真反省。文中一句Hater，感覺是指向所有批評聲音並盲撐反擊，令到大家難受、失望。這並非我文中的意思，但我知道觀感就是如此，所以決定清楚道歉。對於批評和非攻擊性的說話，我從來謙卑聆聽反省，以後日子我會用時間和言行去證明。

2.當日表演完畢，見到網上的咪嘴說法，但卻肯定自己有唱，我才鼓勵她理直氣壯面對。而當時並未有重溫，我並不知道轉播出來的效果竟然如此。事隔已經一星期，至今仍然沒有人解釋是技術故障還是溝通失誤，所以我現在將我所知的講清楚。

以後我會專心工作，與工作無關的事情我會從此慎言敏行。對不起。」

曾樂彤在網上公開道歉，她以短訊回覆東網：「不再回應了，謝謝。」而她的經理人霍汶希表示：「佢知自己一時衝動做咗錯事，佢都知自己唔啱，我覺得後生仔女應該畀多啲機會佢哋，呢件事佢已經吸取到教訓，我哋公司都會繼續支持佢、勸免佢，希望佢可以做一個正面嘅形象回饋社會。」