搵KOL演出？蕭定一計劃開拍新《IQ成熟時》

亞視與蕭定一攜手合作，在香港國際影視展舉行《經典重生 完壁歸趙》發布會，中國3D數碼娛樂有限公司主席蕭定一與亞視行政總裁何麗全宣布，蕭定一之前向亞視購入爸爸蕭若元當年有份製作的29部麗的電視劇，現時決定把這些劇集版權賣回給亞視，而其中3部會重新開拍，蕭定一表示：「當時呢啲電視劇機緣巧合下落喺我手上，依家還番畀亞視我都好開心，嗰時佢哋就等於暫時寄養喺有感情嘅代父身上，經歷咗3年，依家返番亞視，喺亞視都合理過喺我手上，我對劇集都有感情，所以如果我哋一齊拍就可喜可賀。」現場播出短片，宣布會把《IQ成熟時》拍成《EQ成熟時》，《天蠶變》拍成時裝武俠劇《天蠶變異》，《大地恩情》照舊，在並大灣區搭建場地拍攝。

開拍3套劇計劃搵KOL演出

蕭定一受訪時，表示當時亞視把29部劇集的永久版權賣給他，現時賣番這些劇的永久版權給亞視，其中有興趣拍其中3套劇由他們公司製作，亦會聽取亞視意見，而演員方面就要大家有共識。他表示其中《EQ成熟時》會拍先，今年暑假開拍，用青春片捧新人，會搵新人及KOL演出：「當時用大量DJ，其實依家嘅KOL就等於當年嘅DJ。」而講到蕭定一旗下公司的財政情況，他坦言：「都緊張㗎，買賣都係要㗎。（今次幫到幾多？）啲啦，上年年尾影視行業係差，多謝債權人諒解，公司運作非常正常，其實今次我哋都有3部電影會上，如果有好成績公司咪會健康。」

公司未有逃亡潮

講到華納向其旗下音樂平台公司追討版權費，法庭判決他要支付210萬和訟費給華納，對此他表示：「嗰個要睇吓點解決，嗰個業務已經冇做。」問到今年其公司可還會拍攝？他表示：「會，例如呢啲劇，但投資會少啲，重心喺製作多啲。」問到其旗下藝人的合約？他有點感觸表示：「我都感恩，仲未有任何藝人喺合約期內提出離開，合約完咗就另一回事，多謝大家都好錫我。（仲有幾多藝人？）全部。（張智霖都係？）仲係，大家滿約先算，起碼冇逃亡潮，都感恩。」