打到休克！楊柳青為新片受傷肋骨移位

藝人馬志威、楊柳青（小青）、葛民輝、元秋等主演之電影《入鐵籠》正式上映，戲中，楊柳青飾演「巴柔女神」麗麗，更是拳館的大師姐。一向以打女形象示人的小青，因拍此片才了解MMA及開始學習巴西柔術：「自己好鍾意學習新嘅事物，我因為電影接觸咗巴西柔術之後，都覺好啱女仔去玩，因為好近身，有咩危險都可以即時反應到。」雖然武功底子好，但都難免會受傷，小青就話拍攝時撞到肋骨，令到呼吸困難：「有場戲我同一位師姐對打，點知唔小心撞到胸口位置，令到肋骨移位，非常辛苦，我一郁或者笑都會非常痛，好似插住咗個心口咁，之後因為受傷，有一場我要做個飛踢動作，一下唔夠力就失平衡跌落地，仲休克咗幾秒。」雖然有受傷，但小青就話不會因此嚇怕，希望大家記得她是一個打女。

小青如此努力演出，難怪有份演出的元秋及葛民輝都大讚小青，元秋話：「最深刻係楊柳青巴西柔術嗰一幕，見到佢傷咗都仲繼續，估唔到佢咁勁、咁捱得！」葛民輝謂：「楊柳青好搏命，練咗唔夠一個月，但打得有模有樣，唔係平時女仔嗰種扯頭髮、扯衫咁打，而係有招式，一來一往，好厲害！」