首次出埠開工　蘇可欣掛住傾偈唔願瞓

前港姐兼無綫娛樂台主播蘇可欣（Eunice）近日同程皓一齊飛到南京工作，今次係Eunice首次出埠開工，所以特別興奮，佢話：「對上一次去南京已經係講緊做空姐嘅時候，都有差唔多3年時間冇去過，所以今次有把握機會，喺嗰度食番以前做空姐嘅時候好鍾意食嘅嘢，例如生煎包、烤鴨。今次同程皓一齊去，成個過程有佢陪住好開心，我哋仲第一次一齊孖鋪，傾咗幾個鐘先捨得瞓。」

Eunice表示原本當日表演只係唱兩首歌，但佢唔想咁悶，所以臨時決定跳埋舞：「其實呢個Job係純粹上台表演一陣，可以選擇唱兩首歌，但係我唔想咁悶，所以我咪自己加跳舞入去，好似好睇啲咁，增加娛樂性。」