難忘偷啜余香凝！潘燦良為乜耿耿於懷？

今年金像獎最佳男配角競爭激烈，有資深舞台劇演員潘燦良與袁富華、老戲骨廖啟智（智叔）、實力派演員黃德斌和李璨琛，個個皆是好戲之人。潘燦良在電影中演活了典型小男人的角色，他指偷吻余香凝一幕令他印象難忘：「原本係講我哋喺沙灘漫步時，我偷吻佢，但因為場地問題，所以改咗個場景，呢樣嘢令我幾耿耿於懷，可能我希望有嗰種浪漫感覺。」

爭獎平常心

提到潘燦良繼21年前憑《南海十三郎》後再度提名男配，他坦言今次平常心得多：「我都唔係第一次，既然上次都過咗，今次只係其中一個過程，所以冇特別緊張，諗住嗰晚係去玩，有諗過會攞，亦有諗過唔會攞，但都會諗定講咩（致謝詞），咁係咪好希望攞？又唔係囉！心情係輕鬆冇壓力。當晚（女友）蘇玉華會一齊去，反而會諗大家要着咩衫。諗衫多過諗獎。」他自言已過了最恨攞獎的關口，第一次提名時真的恨攞，覺得是事業上一個重大契機，可惜終跟獎項擦身而過：「嗰年我去唔到頒獎禮現場，因為我要做舞台劇，演出時真係有啲心緒不寧，攞唔到係失望。」

潘燦良直言看好對手袁富華：「佢嘅演出好好，個角色唔容易拿捏，加上角色有話題性，會比較受關注。當日佢攞金馬獎，我都即刻WhatsApp恭喜佢，好戥佢開心，尤其我哋作為舞台劇演員，唔容易有機會喺舞台劇以外攞到好角色，至於智叔係神級演技，要睇吓觀眾鍾意邊個多啲。」

場地：烏龍魚男／Barry＠relaxdearhk