紅到去澳洲！《愛．回家》鐵面陳畀洋妞抄牌

拍得無綫劇《愛．回家之開心速遞》嘅演員唔人氣急升都會為人認識，好似「鐵面陳」王致狄咁，就算只係飾演保安主管，但都成功入屋！Andy喺劇中深受女士歡迎，係筍盤中嘅筍盤，而現實中嘅佢都好有異性緣！

早前佢去到澳洲珀斯旅行，就有靚女向佢埋身，佢笑言：「記得有日去到其中一間酒莊，嗰度比較偏遠少華人去，突然間有兩位外籍女士過嚟同我影相，主動同我哋傾偈，仲交換埋contact，都算係個小艷遇啦！」唔知有冇下文呢？

本身對品酒略有研究嘅佢仲自爆有意投資酒類生意：「今次係第一次去珀斯，亦係第一次親身去到酒莊，真係大開眼界。我自己不嬲都鍾意品嘗吓紅酒、白酒，因為可以放鬆心情。而自己都希望第時有機會做啲同酒有關嘅小生意，所以今次算係順道取經。」當然不少得要享受陽光與海灘及遊遍各個著名打卡位啦！