余香凝擺烏龍以為冇提名！匿入九龍公園爆喊

現年25歲的余香凝（Jennifer）今年於金像獎有三項入圍，當中包括「最佳女主角」、「最佳女配角」以及「最佳原創電影歌曲」，對於影后及女配角入圍，Jennifer直言對手太強，從沒想過奪獎，所以毫無壓力，談到今年「最佳女配角」與惠英紅、周家怡、黃璐以及蔣璐霞爭獎，Jennifer笑言：「個個都好有實力，周家怡喺《無雙》入面，好man，我覺得佢演戲連說話聲線都有去控制同落功夫，同平時嘅佢好唔同；至於紅姐（惠英紅），我喺《翠絲》入面做佢個女，我唔需要拍戲嘅時候，會企埋一邊欣賞佢做戲，佢就算排戲排咗8-10個Take，佢都會好認真咁去拍，每一個Take，佢都會用盡100%力量去做，就算要佢一個鏡頭重複做好多次，佢都可以由頭嚟過，每次都可以有真眼淚，演技真係好犀利，好值得我去好好學習。」

於金像獎有三個入圍，當然可喜，公布入圍名單當日，原來Jennifer曾經「擺烏龍」，一度以為自己零提名：「嗰日因為心情太緊張，所以都唔敢睇網上直播，去咗尖沙咀買啲工作用嘅嘢，希望分吓心，等自己冇咁緊張，記得當日應該兩點鐘宣布，我等咗一段時間都冇電話搵我，我都打定輸數覺得自己冇，下年繼續努力，點知冇幾耐，經理人就打畀我，仲同我講，我有三個入圍，嗰一刻真係好開心，即刻喺街上面喊咗出嚟，但又唔想咁肉酸畀人望到，就即刻走入去九龍公園冇乜人嘅角落度，繼續喊，我經理人好搞笑，喺電話度同我講，叫我唔好喊住，講咗感受先，好多傳媒朋友問緊。」

今次「連中三元」，余香凝直言有兩個人比她更開心：「知道消息嘅時候，媽咪、妹妹都好激動，即刻喊咗出嚟，主要因為覺得我嘅努力終於有回報，當日咁啱係妹妹生日，佢一早已經同我講畀晒啲運氣我，嗰晚我哋去咗一間環境好靚嘅地方食飯，開咗支紅酒慶祝，我媽咪酒量好淺，飲少少已經醉咗，又笑又喊。」

場地提供：CHI CHI CHAM-吱吱朕

Wardrobe：Initial

Hair：Hugopoon@ii alchemy