恨挑戰舞台劇　張衞健演得唱得瓣瓣掂

「大帥哥」張衞健（Dicky）晚上到大會堂為「第二十八屆香港舞台劇獎」擔任「最佳男主角」頒獎嘉賓，Dicky笑謂不明為何會找一個做了多年男主角，但從未攞過「最佳男主角」的人去頒獎，他笑說：「其實我咪人版，做咗成世戲都未攞過獎，但依然對戲劇充滿熱誠，係咪好大鼓勵？」

有指Dicky有意開棟篤笑，他受訪時承認的確有人洽談他舉行棟篤笑或演唱會，他笑說：「未諗掂，呢兩樣都未做過，唔知做唔做得嚟，但弊就弊在我有咁嘅才華，驚紅館冇咁多期畀我，12個月畀晒我都唔夠。」

擔心質量及票房

問到Dicky是否因觀眾期望而令他有壓力？他笑言：「兩方面，質量同票房。（票房你都要擔心？）你哋知人口面不知心，都擔心㗎，冇人睇就冇人睇，希望有勇氣去面對挑戰，但真係話唔埋。」Dicky表示舞台劇是他第三樣想挑戰的東西：「我演戲咁多年，又係唱歌出身，即係有舞台經驗，夾埋咪叫舞台劇囉，音樂劇又得喎。（四樣邊樣最有信心？）樣樣都有信心，問題係觀眾覺得好唔好睇，棟篤笑會係最難，因為有九成嚟自演講者。」