東方日報C1:吳彥祖盲腸潰爛延醫險死

20190526
東網電視
更多新聞短片
斷食9日暴瘦15磅!
現年44歲的型男吳彥祖(Daniel),最近到法國出席康城影展時被發現明顯瘦了一圈,他受訪時自爆經歷了一場大病,因拖延醫治盲腸炎引致盲腸潰爛,險些命喪美國!
吳彥祖上月返港出席香港電影金像獎,日前則現身法國康城影展,惟身形明顯消瘦,令人擔憂!他接受男子組合廿四味訪問時,自爆早前在美國患上一場大病,有一晚食飯後突然嘔吐,起初以為食錯嘢,但捱至翌日情況仍未改善故往求醫。他透露醫生當時開了胃藥及止嘔藥,惟服藥後未見好轉,持續屙水:「唔係屙爛屎,係飲水屙水,每10分鐘就去廁所。」有見及此,他索性不喝水,結果足足兩日沒小便!
Daniel指病情過了兩日依然反覆:「一係突然之間冇嘢,一係就發燒要食消炎藥,依然好乸痛,即係好似畀人踢春X咁,每10分鐘踢一次!」又坦言因太太Lisa S.不在家,家中只有家傭和女兒,無人知道他有多痛苦。問到為何不到醫院求診?他解釋:「我住嗰區去親醫院都係大單嘢,即係中槍有血案嗰啲,所以如果去到話係食錯嘢,可能會叫我坐喺度等,所以費事去。」
Lisa S.心痛責備
苦無對策下,Daniel惟有向家人求助,姐姐見情況不妙,立即帶他前往白人區、離家30分鐘車程的醫院。醫生立即替他做電腦斷層掃描,發現其盲腸發炎,導致盲腸潰爛兼爆開,需立即開刀,他說:「醫生話平時啲人如果係咁最多頂到2個鐘,唔明點解我可以頂到3日!雖然開刀,但都掹唔到盲腸出嚟,因為入面全部腫晒,如果堅持要攞就有機會整穿其他部位,咁會好麻煩!最後我只係洗腸,吊消炎藥吊咗一星期,盲腸仍然留喺體內。」問到會否復發?他說:「要等半年睇吓點,只有7%會出現!醫生話做咗呢種手術10年,都未見過咁嚴重嘅,如果再等多一日就會死!」他續指當時得知要開刀,只避重就輕地通知太太,免得她過分擔心,而太太亦立即揸10多個小時車趕赴醫院,知道事態嚴重,立即痛罵他為何死忍!
臥病在床齋睇冇得食
由病發至好轉,前後經歷了九天的折騰,Daniel在沒有進食的情況下暴瘦15磅,劫後餘生的他開玩笑:「當時住院最辛苦係喺病床冇咩可以做,以為可以睇吓電視啦,點知全部都係飲食廣告!」他表示原定該星期到加拿大滑雪,而當地的山區醫院設備未算先進,慶幸自己沒有帶病啟程,否則後果堪虞!
更多新聞,請瀏覽東方日報網頁: