澄清冇離巢　黃浩然簽古仔因為仲有夢

藝人黃浩然晚上在尖沙咀出席活動，黃浩然最近約簽古天樂旗下的經理人公司，有指他離巢無綫轉戰影圈，他澄清說：「一路同TVB都有合作，仲有兩套劇未出街《多功能老婆》同《法證先鋒IV》，其實過去一年已經係由我老婆幫我做management，同TVB一直係藝員約，之後都會繼續拍劇，今次簽經理人公司覺得自己對電影仲有個夢，會電影、電視兩邊兼顧。」

黃浩然指與古天樂認識二十年，在偶然的機會下傾談，一拍即合，他說：「上年太太幫我做Management，自己都沉澱咗一年，喺度諗要唔要跳出comfort zone，古仔就出現喇，大家一拍即合。」

有指黃浩然因意興闌珊離開無綫，他說：「唔好打爛我飯碗，雖然我唔係親生仔，但珍姐（曾勵珍）一路都畀好多機會，病咗都畀好多鼓勵我，之後都會繼續拍劇、電影兩邊兼顧。」黃浩然指經過早年大病後更注重健康及注意飲食。