陳慧敏獨遊遭非禮　小肥：你醒定啲啦！

歌手小肥和陳慧敏（Vivian）是相識十多年的好友，對於好友在開羅涉嫌遭非禮，他接受東網訪問時說：「之前有同佢聯絡，但呢幾日冇，因為我拍緊嘢好忙，係劇組啲人講我知，唉…聽到梗係又擔心又嬲，會立即打畀佢，我會大聲叫佢：『你醒定啲啦』，佢個人太信人啦，覺得個個都係好人，雖然佢唔係最靚，但女仔都係蝕底，我只想佢安全返嚟囉。」

他又指得知Vivian要孤身展開100日環遊世界之旅，由絲綢之路開始，經過新疆、巴基斯坦、印度、杜拜、埃及等，已多度叮囑她萬事小心：「我叫佢去要印度要搵個女導遊陪佢，同叫佢唔好一個女仔出街，但佢就夠膽死一個女仔周圍去，佢黐線㗎，我覺得一個女仔去旅行係好有理想，但都要顧吓安全囉。」