The Black Sheepee爭新人獎平常心對待

2019年12月04日 04:15
東網電視
更多新聞短片
女子組合The Black Sheepee最想見到Eason。
今年樂壇有好多生力軍都係實力派創作歌手,其中有女子組合The Black Sheepee,問到有冇信心爭奪新人獎?成員Hei Hei同Yanny都異口同聲話抱以平常心︰「當大家同學仔、共同成長,大家都好好。想得到人哋喜好就個個都想,但用獎呢個形式未係代表到啲人究竟有幾喜愛你,每個人嘅特點都唔同,好難去比較,開心嘅係大家聚埋一齊睇到唔同嘅優點,就可以去改進自己,係良性競爭。有入場卷參加就已經好大鼓勵,好想見Eason(陳奕迅)同佢集郵,步伐跨咗一大步!」
喺以「新人」再出發嘅呢年,The Black Sheepee話學會點樣去令自己更加有信心,同埋要相信自己係得嘅︰「雖然係獨立(歌手),但每次去到唔同地方接觸唔同嘅人,都發覺自己以前嘅圈子太窄,今次好榮幸跳到出嚟,去到公眾容易接觸到嘅平台,呢個係跨越新人嘅身份,嗰件事再唔係自己默默做而冇人見到,終於有人睇到,份滿足感係好強﹗依家都係做自己最鍾意嘅音樂,咩題材都係咁自由,但就多咗好多人幫手,群策群力,再唔係兩個人嘅事,有好多嘢會係新嘗試,冇諗過自己首歌得到咁多嘢。」考慮簽唱片公司?二人同聲指暫時未有考慮,亦打趣笑話都冇人搵佢哋︰「慣咗自己照顧自己,好獨立唔使靠人。」
場地︰The Stadium 觀塘店