囡囡似自己！周柏豪咩都願意畀晒老婆

歌手周柏豪與太太Stephanie剛剛榮升父母，愛妻為他誕下6.7磅重囡囡，晚上七時許柏豪與數名友人現身醫院探望太太及BB女，大批記者上前恭喜他時，他即說：「多謝，好開心，幸福唔係必然，我同太太都好幸運，好感恩，生咗一個好可愛嘅BB女。（咁秘密？）老人家想低調，諗住出院先交代，點知大家咁快知道，不過都唔緊要啦，開心事嚟。」

問到有否入產房時，他表示：「本來諗住入到去都處理到，點知入到去十秒就喊，反而太太叫我冷靜啲，自己都好感動，覺得女人真係好偉大，以前我鍾意深色衫，但個女出世後就鍾意白色同粉紅色，因為囡囡愛上粉紅色。」

他更透露太太是12月2日剖腹生產，過兩天便出院，他說：「不過囡囡仲未改名，會計時辰八字等師傅改。（囡囡似邊個？）似我，個嘴有個啄，似我咁多口。啲人話通常女仔最鍾意恰爸爸，希望個女大過咗係一個有家教嘅女仔，唔好恰爸爸啦。」至於如何獎勵太太？他說：「一路都獎勵緊，咩都畀晒佢，樓又好，身家又好，全部都畀晒佢，佢開心就得啦。」