甩拖後首現身　馮盈盈激動落淚！

藝人馮盈盈宣布同醫生男友分手，結束四年情。今日她現身電視城，為劇集《逆天奇案》拜神，她穿上黑色窿窿衫現身，更大方地與拍檔張頴康合照。早前，盈盈於劇集《解決師》中與張頴康拍攝超激浴室親熱戲，盈盈男友更睇到「心靈創傷」。

和平分手

首度開腔談分手內情，盈盈表示今次與男友經過和平及理性處理事情，為免被指講大話，故決定公開分手一事，她說：「身邊朋友問起冇特別去講大話隱瞞，決定咗就順理成章話畀大家知，其實都分開咗一段時間，係今個月份嘅事。（咩原因？）冇第三者，兩個人之間嘅事，相處容易相住難，兩個唔同嘅人一齊生活，環境上多轉變要去適應，過程中最舒服係大家變番朋友，其實都考慮咗一段時間，大家有傾過嘅共同決定，係和平理性分手，依家係有傾有講朋友關係。」

愛巢有方案處理

問到會否挽救這段情？盈盈坦言現階段不會，但認為未來有很多變數，故一切隨緣，認為現時做回朋友關係更舒服。至於二人同居的單位，盈盈表示雙方已分別搬離愛巢：「呢個地方問題會有方案處理。（層樓會賣？）睇定啲先，好理智。（你哋一齊供？）呢啲比較深入問題。（層樓男友名喎！）有方案對大家都公平嘅。（覺得4年情可惜？）又唔覺得特別可惜同遺憾，呢4年一齊經歷同成長好多。」

唔關激情戲事

說罷盈盈便忍不住流淚，要停頓片刻再續說：「呢幾年都係開心嘅，又冇話不捨，大家感恩呢4年時間，一齊扶持同成長，所以都會互相祝福，冇負面情緒喺入面，好感恩同幸福可以遇到佢。」有指分手導火線乃她與張頴康拍激情戲，盈盈卻否認說：「同工作上唔太大關係，佢一直支持我，多謝佢諒體同包容。（又傳你之前都係搶人男友？）我哋都有睇到呢個留言，都覺得好無稽之談，一笑置之。（會唔會假分手，低調處理感情？）又唔會，講得出好明確，冇隱瞞。」